城中鏡：靚歌化矛盾
點樣可以令近年中港矛盾降溫？早前沙田馬場舉行年度盛事「太子珠寶鐘錶精英盃」賽馬日，太子珠寶副主席兼執董Emily鄧宣宏雁特意邀請人靚聲甜嘅中國女高音歌唱家周旋獻唱多首名曲，包括家喻戶曉嘅民族小調，聽到台下嘉賓拍晒手掌。Emily話音樂冇語言同地域限制，希望藉住傳誦一時嘅歌曲令香港人接觸多啲中國文化，潛移默化之間，或許有助港人搵番民族認同。
周旋（右二）同丈夫程里全（右一）與孫大倫夫婦（左一及二）喜相逢。
名媛曹眾（右）即場訂購由太子珠寶集團設計部主管戴芸玄（左）設計嘅鑽飾耳環。
鄧鉅明（左二）同太大鄧宣宏雁（左一），與應家柏（右二）及利達賢齊做主禮。
盼關注留守兒童
Emily話自己同周旋相識唔耐，但兩人十分投契，佢盛讚周旋經常為慈善而唱，所以要支持對方。同丈夫及三歲半兒子移居香港嘅周旋就話，最近佢啱啱自資搵人作曲填詞，由佢主唱公益歌曲《沒有天空的星星》，希望引起社會各界關注內地數以億計嘅留守兒童問題。
當日入場嘅政商名流多不勝數，仲有馬會行政總裁應家柏同賽馬事務執行總監利達賢等馬會高層，太子珠寶主席鄧鉅明同太太Emily忙到滿場飛。
中港照相器材主席Dennis孫大倫同太太鄧秀英都有到場，熱愛攝影嘅Dennis啱啱參加咗一個旅行團，同來自世界各地嘅團友豪包客機行咗一趟絲綢之路。眾人由伊斯坦布爾出發，一路飛一路玩，最後返到新疆，前後只用咗十二日。Dennis笑稱，如果用腳行至少要行三年。
