雖然佔領行動已結束咗半年，但金鐘添美道一帶嘅帳篷同搭建物唔單止未被清理，數量仲有增無減。建制派一直要求當局採取行動，單係六月已有三次、車輪戰咁喺立法會大會上以書面質詢相關政府部門，要求佢哋回覆舉報同投訴宗數，同埋解釋點解仲唔執法。

阿Paul轉問波波

繼建仔嘅陳克勤同工業界嘅林大輝先後向保安局局長黎棟國提出相關嘅書面質詢後，獨立議員Paul謝偉俊尋日亦以書面質詢政府幾時執法，唔知係咪見到保安局嘅答覆已經冇乜新意，阿Paul轉為問發展局局長「波波」陳茂波，希望尋求一啲明確答覆。

阿Paul喺書面質詢提到，當局曾於一二年驅趕深水埗區行人路上嘅露宿人士，並移走佢哋嘅財物，但就遲遲唔清理添美道上嘅帳篷同單位。佢要求當局解釋點解對兩宗佔用行人路有唔同執法方式，同埋有否評估過對搭建物置之不理所造成嘅法律及行政後果，試圖從法律角度出發。

不過，政府嘅答覆都係換湯唔換藥，話唔適宜直接比較唔同時間、性質同社區嘅問題，各部門會密切注意路段情況，檢視所需嘅跟進措施，並會喺適當時候採取適當執法行動。睇嚟建制派要繼續研究吓，類似問題仲可以拋畀乜嘢部門，先可日以繼夜、夜以繼日咁跟進上述問題，唔知佢哋嘅決心會唔會受到打擊呢？

第一手消息請下載on.cc東網iPhone/iPad/Android/Windows Phone Apps