十一月底就係區議會換屆選舉，好多平日冇乜人留意嘅地區議題，最近都好受到議員關注。建仔嘅立法會議員阿Ben陳恒鑌尋日提出口頭質詢，指葵青區一帶空氣污染問題嚴重，污染物主要嚟自停泊喺葵涌貨櫃碼頭嘅貨櫃船，仲形容該區居民每日吸緊毒氣。同屬新界西嘅工聯會議員Alice麥美娟亦唔執輸，追問當局有冇光同噪音嘅管制措施。但係Alice嘅發言就被主席話同主體質詢冇直接關係，離晒題，可見選舉壓力已殺到埋身。

陳恒鑌同麥美娟爭相就當區問題質詢當局。

麥美娟

阿Ben話每日有萬幾支煙囪對住葵涌居民，批評當局淨係宣傳停車熄匙，停船熄匙就放軟手腳。其實葵涌貨櫃碼頭每日有咁多船停泊，空氣污染並唔係新鮮事，相信居民亦唔係第一次投訴。不過，選舉將至，議員們對地區事務開始上心，即使係雞毛蒜皮嘅事都可以拗一餐。

第一手消息請下載on.cc東網iPhone/iPad/Android/Windows Phone Apps