虐老院舍被釘牌 安老問題怎解決
古人話，一入侯門深似海，家陣應該改為一入院舍深似海至係。冇誇張o架，大埔私營護老院早前爆出虐老醜聞，仲揭出社署監管不力，當局終於知衰，尋日正式拒絕有關院舍嘅申述，即係即時釘牌咁解。
換言之，該院舍二至三樓唔可以繼續經營，涉及嘅五十多名院友已遷出，除小部分遷往該院一樓，大部分遷往區內其他院舍。點都好喇，呢間護老院視老人家尊嚴如無物，釘牌係咎由自取，與人無尤。
不過咁，一間護老院被釘牌，係咪等於安老問題就得到解決呢？答案唔使講嘞啩。係人都知，本港安老政策天殘地缺，資助院舍嚴重不足，好多市民就算明知私營院舍質素良莠不齊，亦只能無奈將長者送去入住。正如有家屬話齋，大埔院舍嘅虐老事件只係冰山一角，其他私營院舍一樣唔好得幾多，最慘係投訴無門，長者反而隨時被職員報復，你話呢個係乜嘢世界吖？
有立法會議員就講得啱嘞，港府一直唔肯承擔安老責任，乜都推畀自由市場，自己就關人個關，點會唔問題多多吖。呢，好似早前突然煞停嘅院舍券咁吖，話就話畀輪候資助院舍嘅長者自行挑選合心水私營院舍，做到「錢跟人走」，其實咪又係卸責，盲目將老人家推向質素毫無保證嘅私人院舍，同推佢哋落火坑有乜分別喎。
講起就心酸，長者辛勞大半生，到頭來被政府視為包袱，唔係叫人居家安老，就係叫人北上安老，總之推得就推，卸得就卸。香港係富裕社會，港府坐擁金山銀山，竟然任由每年數千名長者喺輪候資助宿位期間含恨而終，唔少基層長者要靠執紙皮維生，簡直係恥辱。
冇計嘞，港府善財難捨，莫講話要動用公帑增加資助宿位，淨係檢討《安老院條例》咋，都一味採取拖字訣。呢條條例實施至今近二十年未修訂過，早就不合時宜，期間不時有院舍爆出虐老醜聞，甚至有護理員逼長者食糞便，港產官僚咁都可以詐傻扮懵，若無其事，真係唔到你唔服。
所以話，要解決安老問題，首先要換咗港產官僚嘅腦袋。嗱，政務司司長林鄭月娥話喎，夢想係長者唔使排隊就可以入住院舍，講就好聽喇，問題係做唔做得到呢？社署聲稱會全面檢討巡查及監管制度，講多無謂，食多會滯，坐言起行最實際吖，叮！
