城中鏡：敢於創新
香港菁英會日前舉行周年大會兼選出新一屆嘅執委，常務副主席Wingco盧金榮將接棒做新一屆主席，副主席莊家彬就升任常務副主席，新班子將喺七月一日上任。Wingco話上任後，將投放更多時間落青年工作，鼓勵年輕人敢於創新。現時好多年輕人成日想創業，但佢認為香港嘅年輕人有創意，不過唔係個個都適合創業咁話。
梁宏正（右）將交棒畀盧金榮（中），左為施榮忻。
林凱章（右）同白富鴻都係南海人，感覺特別親切。
周雯玲月底將到北韓探秘。
膠鴨現身荔園
Wingco話港青有創意，無論係做管理或行政工作，若能提供創新嘅做法及意念，好大機會為行業帶來新發展。講到創意，「港版膠鴨之父」林亮孫子兼菁英會副主席Victor林凱章梗係好認同。佢爆料話大家熟悉嘅黃色膠鴨仔將喺中環海濱嘅荔園亮相，到時將以類似「擲香口膠」嘅形式出現喺樂園之中，齊齊同港人搵番童年回憶。童年時經常去荔園嘅Wingco就話最懷念海盜船同恐龍屋，遲啲會帶兩個女兒去玩個夠。
當日在場嘅仲有創會主席施榮忻、榮譽主席白富鴻同現任主席梁宏正等人，仲有躋身新一屆副主席嘅康泰旅行社董事總經理黃進達及菁英會成員周雯玲。周雯玲話今個月底將到北韓探秘，今次行程四日三夜，已經一早做定晒功課，諗到就興奮。咁怕唔怕惹到喺南韓爆發嘅新沙士呢？佢笑笑口話南韓人嚟香港仲多過去北韓喇，使乜驚喎。
