政壇：彭耀佳為員工設聆聽熱線
今屆喺十月舉行嘅「鼠戰中環」慈善接力賽，活動目的之一係提醒香港人要work-life-balance，年年都有落場跑嘅置地公司行政總裁彭耀佳話，大部分發展成熟嘅地區，好似香港咁，差唔多五至六人入面，就有一個人喺唔同階段有某種精神問題，包括抑鬱、厭食等。
彭耀佳話有個平衡嘅工作環境，對保持身心健康係好重要嘅。
所以話呢，唔好睇香港咁發達，中環人個個身光頸靚、容光煥發咁，其實潛伏有情緒問題嘅人，總有一個喺左近o架！
咁身為老牌中環大地主嘅置地公司，有乜計仔令員工避免呢啲問題？彭耀佳就話公司有康體活動畀員工參與，增加佢哋社交活動同運動量，而且仲有醫療計劃，包埋畀員工睇精神科醫生，更周到嘅係，公司設有二十四小時熱線服務。當員工壓力大、想傾偈嗰陣，可以隨時撥個輪，相關專業人士會聽佢哋傾訴咁話。但彭耀佳強調最重要係有個平衡嘅工作環境，壓力係會有，但不可過分。
