政壇：搞搞政：黃大仙 車公早諭政改難通過
吵鬧咗好耐嘅政改方案，估計本周內就有終極結果，泛民言之鑿鑿，指會否決方案，政改被拉倒似乎已無懸念。其實早喺年初，已有預言政改凍過水。我哋喺二月就香港政治問題，到黃大仙祠求籤問卜，結果求得一支「夷齊讓國」中平籤，籤文提到伯夷叔齊兩人因恥食周粟而餓死，意味如各方不願意妥協，堅持己見，政改通過機會堪憂。籤文仲預示，本港喺清明過後至重陽之前（即六至八月期間）政治失運，偏偏政改方案表決亦揀中呢段時間。
設計圖片及對白
撞正「月破日」恐不利
其實，年初二當日，時任新界鄉議局主席劉皇發求嘅車公靈籤「晨粧露彩髻邊雲，玉佩珠顏錦似銀；色則是空空是色，觀音曾勸世間人」，亦都寄語香港人今年應該要實事求是，唔能夠貪心，否則只會乜都得個吉。言下之意，就係泛民若然貪心，叫價過高，不顧政治現實，最後政改只會得一場空。而泛民依家仍然堅持要中央撤回人大「八三一」政改決定，可以話係不可能的任務，最後只會連個吉都冇。
咁仲未夠，著名堪輿學家蔡伯勵上個月就話下周三同七月八日都係好日，如果喺呢兩日審議同表決政改方案，都會有圓滿嘅結果，特別係喺下周三嘅話，市民往後應該會有好日子過。早前堪輿學家麥玲玲同李丞責都話今日同聽日都係凶日，唔止同特首梁振英生肖相沖，而且仲係「月破日」，意味政改得唔到支持，如果政改方案一定要得，就唔好揀呢兩日處理咁話。
之不過，政府百無禁忌，決意要喺今日向立法會提交政改方案決議案，政改過唔到，唔通都係天意？
