政壇：創科局闖關 年底勢通過
雖則政改大戰喺日內即將明朗同落幕，但唔代表立法會內嘅政治爭拗會從此告一段落，因為立法會財務委員會好快成為另一戰場，財委會仍有一項具爭議性嘅創新及科技局撥款等待通過。政府早前已決定將創科局撥款硬闖財委會，仲申請「打尖」先行審議創科局，然後先到其他民生事項撥款。據政府內部評估，即使泛民主派議員玩「拉布」，估計去到十一月前都會就範，讓創科局撥款通過。
設計圖片及對白
建制添武器 泛民未必奉陪
創科局撥款喺過去兩年已經一波三折，舊年更因為「拉布」而被泛民成功拉倒，令政府內部非常洩氣。不過，政府消息人士就話，今次好有信心會成功，佢哋打算將創科局撥款放喺幾項重要民生撥款議案之前，例如公務員加薪、綜援、生果金出三糧、公屋免租兩個月等撥款，藉此將壓力轉嫁予泛民。如果泛民打算以「拉布」拉倒創科局撥款，等同拖延公務員加人工同基層市民「食糖」，變相與大批市民為敵。
其實舊年政府都用過同一招數，惟最終未能奏效。今年政府咁有信心，係因為十一月區議會選舉臨近。政府內部分析，指極大部分市民都唔認同「拉布」，甚至有市民因為「拉布」而討厭泛民，如果選舉前夕，泛民仍然沿用「拉布」呢招，一定大失民心，只會成為建制派喺選舉期間嘅最大武器，到時建制派只要一句「踢走拉布議員」，相信一定有市場。
政府評估白鴿黨、公文袋同工黨等幾個泛民政黨，面對選舉壓力下，即使社民連同人民力量願意打拉布戰，呢幾個泛民政黨都唔會配合激進派人士嘅拉布戰略，政府有信心十一月區選前可以通過創科局撥款。
到底政府呢個如意算盤係咪打得響，過多幾個月就知嘞！
