美容行業無王管 毀容陷阱知多少
早排電視台選美比賽舉行面試，照例又有口痕友抽水，有人形容今年係「最醜嘅一屆」喎，亦有參選佳麗被指整容。其實計太一叮話齋，美醜呢家嘢好主觀嘅，忠於自己，點都好過愛靚唔愛命，美容變毀容吖，係咪？
話說最近時興植眼睫毛，坊間唔少美容中心提供「半永久延長睫毛」服務，聲稱喺真眼睫毛上以黏合劑連接假睫毛，可以營造出大眼睛效果喎。咁實際又係點呢？消委會調查後發現，植眼睫毛存在引致過敏風險，嚴重嘅會導致角膜結膜炎等眼部感染，甚至影響真睫毛再生，導致睫毛數目永久減少。咁都未算，部分美容中心使用嘅黏合劑化學成分具揮發性，有機會刺激眼睛、皮膚同埋呼吸道，後果真係可大可小o架。
話時話，美容服務質素一向良莠不齊，危機四伏，植眼睫毛有風險只係小兒科咋。三年前大型醫學美容集團發生「毒血針」事故，造成一死三傷慘劇，市民都未驚完；舊年又有女士因為抽脂減肥而送命，你話係咪得人驚吖。
最慘嘅係，市民光顧美容健身服務，即使避得過皮肉之苦，荷包亦分分鐘大出血。事實上，消委會接獲大量涉及美容同健身服務銷售手法嘅投訴。有美容公司游說顧客參加比賽，聲稱獎金可抵銷所有費用，然後靜雞雞喺合約內包埋另一個昂貴療程；有健身公司以「刮中有獎」為招徠，氹客人一次過付款購買會籍。消費陷阱五花八門，無奇不有，稍一不慎隨時中招。
冇錯，買賣嘅嘢你情我願，消費者自己都要小心，但當局加強監管亦係責無旁貸，弊在官老爺從來冇吸取教訓。就講「毒血針」事件吖，當局曾煞有介事成立檢討委員會研究設立發牌制度，但最快五年先可以完成立法程序，最怕拖拖吓又添「美容亡魂」咋。當局打擊不良銷售手法同樣係黃腫腳——不消提。《商品說明條例》本來就漏洞百出，加上當局有法不依，咁耐以嚟只有一單美容集團職員威嚇顧客購買療程被判罪成，你話有乜阻嚇力可言吖。仲有喎，威嚇消費就話拉人啫，咁欺詐、誤導嗰啲又點計呀？
嗱，選美佳麗係咪「最醜嘅一屆」就唔知，大家淨係知班官老爺坐享高薪厚祿，胡混度日，連規管美容行業咁小事都搞唔掂，「最廢嘅官僚」非佢哋莫屬啦，叮！
