城中鏡：靚聲行善
話說馬主協會慈善基金早前舉行籌款晚宴，多位馬會大董粉墨登場，為慈善高歌。壓軸獻唱嘅馬會副主席周永健拎起支咪唱《Only You》時，即時歌神上身，仲由台上唱到台下，大搞氣氛叫善長捐多啲。佢笑言賽馬日好恨贏馬，呢晚就好恨大家加碼咁話。
周永健（右一）情深款款大唱英文金曲。
林建康（中）同太太林黃寧艷（右）及林太家姐劉黃寧達齊心行善。
史立德夫婦（左二及右二）帶埋一對子女去撐場。
為善款，大董們瞓身去到盡。有把磁性靚聲嘅大董葉澍堃都開金口獻唱，佢揀咗首《為你鍾情》，甚有唱家班水準。大董陳南祿就全程拎起結他喺台上伴奏。好唱得嘅晚宴籌委會主席史立德梗係要獻技，佢帶頭高歌一曲《Wonderful Night》，仲點名將首歌送畀太太史顏景蓮，令人冧爆嘅表現獲得全場掌聲。
林建康愛駒要訂「鞋」
在場唔少馬主亦分享吓養馬趣事。愛沙尼亞駐港名譽領事Matthew林建康大爆愛駒《勇敢福星》經常「甩鞋」，事關匹馬天生腳形特別，每次穿上馬蹄鐵奔馳時，總係飛甩舊鐵。為免愛駒「甩鞋」跑到腳痛，Matthew同練馬師最後找來一位師傅，為愛駒度身訂造馬蹄鐵，自此馬匹跑得又快又爽，安樂晒。
最令馬主飲恨，莫過於錯過拉頭馬。東華三院副主席王賢誌話幾乎每次愛駒出賽都會捧場，點知有次因為塞車，遲咗十幾分鐘入場，偏偏匹馬喺頭場爆冷跑出，白白錯過拉頭馬，諗起都揼心口。
