政壇：搞搞政：話旅巴載選民投票 一舊雲亂噏惹抨擊
喺年底舉行嘅區議會選舉，相信會係政改表決後「票債票償」嘅主戰場。立法會政制事務委員會尋日討論區議會選舉實務安排，一眾議員不停追問抽查選民住址、選舉廣告同種票等問題，但白鴿黨「一舊雲」黃碧雲突然話，過往喺選舉當日有唔少旅遊巴接載區外嘅選民入選區投票，又問選舉事務處會唔會用兩文三語提醒選民咁做係犯法，呢番言論隨即惹嚟有多年選舉經驗嘅建制派議員反駁。
設計圖片
一舊雲經常不講則已，一開口就令人暈暈哋。佢追問處方會唔會派職員睇吓呢啲旅遊巴幾時到站，同埋睇吓選民嘅手手腳腳，會唔會寫上「掌心雷」、「腳心雷」、「手臂雷」，即係藏有投畀邊位候選人嘅指示。建仔嘅葉國謙聽到佢咁講忍唔住反駁，話由九一年參選區議會至今，未見過有大旅遊巴接載選民去票站投票，可能得一舊雲見過咁嘅情況。佢又話除咗手、腳之外，唔知仲有乜嘢地方可以驗掌心雷？總之聽完之後覺得匪夷所思。即係話一舊雲噏得就噏喇！
雖然一舊雲嘅問題咁搞笑，難為選舉事務處總選舉事務主任李柏康依然耐心回應，稱用交通工具接載選民並冇犯法，但使用交通工具接載選民去票站係提供緊服務同利益，假如促使選民投票畀某一候選人，就會觸犯選舉舞弊同非法行為條例云云。
不過，公文袋嘅「正盲毛」毛孟靜仍然追問，有冇成功檢控一舊雲所講嘅情況？李柏康就話，由於選舉事務處唔係執法機關，所以冇相關數字。正盲毛問選舉機構拎檢控數字，一樣咁令人匪夷所思。
