政壇：立會飯盒議助拒食住先

立法會秘書處為咗班議員同議員助理有啖好食，將增設訂飯盒服務，但選擇就極少，午餐都有三款飯揀，但晚餐就獨沽一味冇得揀。據聞初步反應麻麻，冇乜議助肯「食住先」。

舊年佔領期間，因立法會外部分餐廳暫停營業，搞到個個議助都話冇啖好食，今次連立法會內餐廳都關閉，所以秘書處呢次都算細心，搵咗餐廳喺周三同周四兩日供應飯盒畀一班議員同議助，每款三十蚊，價錢都算相宜。不過，想買飯盒嘅人尋日就要落單兼畀定錢先。

此外，選擇都唔算多，午餐都叫好啲，起碼有三款飯畀人揀，但晚餐就得一款，周三晚飯係冬瓜枝竹火腩飯，周四就係咖喱雞飯。我哋問過一班議助，似乎都冇乜人肯揀「食住先」，寧願出去買飯或帶飯好過。