政壇：媽打返哈佛會30年校友
唔少前高官都曾被派往海外進修。好似民政事務局前常任秘書長「媽打」李麗娟，三十年前就曾被派去著名學府哈佛深造管理課程，早前佢趁三十周年畢業誌慶，飛回哈佛敍舊。
外遊充電回來嘅李麗娟（右），盡顯陽光膚色，旁為保良局副主席蔡李惠莉。
香港各界婦女聯合協進會日前舉行講座，見媽打曬一身古銅膚色現身，原來啱啱遊完哈佛回來。話說三十年前，佢仲做緊財務科助理財政司時，曾被挑選往哈佛深造公共管理碩士學位，個課程眨眼一年讀完。畢業後，同學各散東西，但約定每五年敍舊一次。時光飛逝，今年就係大家畢業三十年嘞，月前各人約定喺哈佛重聚。舊同學重逢，媽打睇落係最後生一個，同學爭相上前請教保養心得，認真搞笑。媽打笑言，係亞洲人得天獨厚，皮膚無咁易蒼老；加上佢平日飲食清淡，心境開朗，所以樣貌、身形都十年如一日囉。
