防疫人命關天 唔該知恥後勇
當斷不斷，必受其亂。面對南韓新沙士疫情一再升級，港府進退失據，起初唔肯發旅警，強調旅遊健康建議已經足夠喎，點知唔夠一日就改發紅色外遊警示，自打嘴巴。連日來市民狠批港府應對失措，防疫混亂，一啲都冇鬧錯o架。
嗱，見過鬼怕黑，經過○三年沙士慘痛一役，市民聞疫色變。家陣南韓爆出新沙士疫情，死亡率比沙士仲高，港府防疫梗係要寧緊勿鬆o架喇。點知官老爺好似老僧入定咁，先係闊佬懶理，搞到有南韓患者成功入境再出境；接住又搞出一個不倫不類嘅旅遊健康建議，唔衰攞來衰，直至被市民鬧爆，當局先改發紅色旅警，反應直頭慢九拍。
反應慢九拍都算嘞，最慘係港府各自為政，左手唔知右手事。食衞局局長高永文身為防疫主責大將，竟然冇參加防疫決策會議，對當局改發旅警一無所知，你話係咪亂龍吖。正如立法會議員批評，無論立法會抑或坊間，早已要求港府盡早發放旅警，可惜食衞局唔敢承擔，以致錯失防疫先機，事件反映港府高層喺防疫工作方面溝通不足。「東方報業民意調查」則顯示，三成半受訪者狠批港府內部協調不足；三成直斥部門間各自為政，顯然唔係無的放矢。
學前政務司司長唐英年話齋，男人最緊要有腰骨、官員最緊要有膊頭。可惜吖，港產官僚防疫一味卸責，將個波交畀南韓當局同世衞組織。大家有眼見，南韓當局應付疫情嘅表現有口皆悲，國內防控不力不特止，仲將禍水外引，搞到周邊地區雞毛鴨血。
至於世衞表現，香港人更加點滴在心頭。世衞總幹事陳馮富珍早年喺香港做衞生署長，搞到怨聲載道，特別係禽流感期間，佢唔係努力防疫，反而大大聲話自己「日日食雞」誤導市民，導致疫情失控，「雞珍」之名流傳至今，而佢領導下嘅世衞，近年處理疫情亦備受詬病，今次處理南韓新沙士更加授人以柄。有人質疑世衞一再唱好南韓防疫表現，係因為聯合國秘書長潘基文都係南韓人，唔係冇道理o架。咁就難怪，三成三受訪者對南韓防疫無信心，更有三成一人認為世衞縱容南韓。
無論點都好，防疫係人命關天嘅大事，始終要自己上心至得，唔可以假手於人。唔該港府知恥而後勇做嘢喇，萬一搞到新沙士入侵，市民實唔放過你哋o架，叮！
