城中鏡：朱潔儀遊加國有艷遇
「港姐畫家」Donna朱潔儀常到世界各地舉行畫展作交流，月初由安省中國美術會喺多倫多舉辦一個加港兩地畫展，共有為數十多名畫家應邀參展，Donna亦係其中之一，展出其新作《眾裏尋他》。
朱潔儀到尼亞加拉大瀑布遊覽期間有艷遇。
Donna話喺當地接受加拿大中文電台訪問期間，仲重遇前TVB主持潘宗明，感覺有如他鄉遇故知，佢話：「我哋之後成班人一齊逛街，買咗十幾件皮褸，當地天氣跌到十度以下，可以即買即着，我又買咗好多書，希望吸取更多創作靈感，原本我仲喺酒莊買咗支靚酒，但唔記得要放入行李篋，以手提上機，結果被海關沒收咗，哈哈！」
留加期間，佢到當地著名嘅博物館同尼亞加拉大瀑布遊覽，更有艷遇，佢話：「喺大瀑布影影吓相，有個外國男士話要幫我影相，然後遞上卡片自我介紹，不過我無畀電話佢。」實行大派檸檬。
