政壇：搞搞政：公文袋畀本土思潮淹沒
近年本土思潮崛起，喺年輕一輩中有一定市場，公文袋黨魁「袋巾傑」梁家傑唔知係咪睇中呢一點，早前接受訪問時話要將本土角度主流化，用本土角度做出發點去審視教育、環保同城市規劃等問題。
佢批評特區政府好多政策都係對內地「唯命是從」，民主派要思考一下點樣可以用本土思維去處理香港民生問題，其後更自爆等公文袋十周年黨慶時會公布一份聲明，到時會將本土論述加入黨綱，以回應社會最新發展。
估唔到以專業見稱嘅公文袋都要隨波逐流，畀本土思潮淹沒。不過，袋巾傑否認自己想搞「港獨」，又話支持本土同中央嘅立場睇法其實係冇必然衝突。佢舉例指廣東省或上海市領導都會為地方爭取利益，強調自己仍然「擁抱溝通」，又話無論叫佢「家傑又好、死硬派又好、抗中亂港又好」，自己溝通嘅心願都係不變咁話。
不過言猶在耳，佢就率先「開價」，要求中央放棄「香港有人勾結外部勢力」、「香港有人要搞『港獨』」等極傷感情同脫離現實嘅講法，咁先至會有溝通開始嘅第一步喎。
對於「後政改」嘅政局，佢都有連串睇法，當問及會否唔參選下屆立法會選舉時，佢斬釘截鐵咁講唔會，但轉頭又疑「改口」，話主觀意願係咪可以貫徹落實同執行，都要睇黨嘅安排同埋整個泛民嘅協調，佢其後更疑似意有所指，直言自己好有黨性。眾所周知，公文袋六名議員有一半「另起爐灶」，佢呢番言論係咪有弦外之音，答案似乎不言而喻。
