政府近年積極鼓勵年輕人創業，有IT界人士卻大吐苦水，指好多年輕人都未經深思熟慮就話要創業，但其實又唔係個個都適合做生意，專資會創會會員兼香港新興科技教育協會創會會長Alex洪文正話，業內因此變得好難請人，相當頭痕。

洪文正（右）係專資會創會會員，同專資會現屆會長盧偉國近期多咗交流。

Alex話年輕人有創業念頭，肯拚搏係好事，但應該先考慮自己係咪適合，例如自己係咪有領導才能同有良好理財技巧等，如果單純有好好嘅技術，但冇適合營商嘅性格，仍堅持講創業其實唔實際。

佢又話現時科技界行內有好多公司都請唔到合適人才，事關比較出色嘅人往往雄心壯志，諗住自立門戶，可惜唔少失敗而回，剩番技術相對冇咁高嘅，反而又要求精英嘅薪酬，結果好多人都「高不成，低不就」。佢更指出，其實只要有能力嘅話，唔創業都一樣可以有好好的發展空間，唔知有幾多人聽得入耳呢？

第一手消息請下載on.cc東網iPhone/iPad/Android/Windows Phone Apps