政壇：盧思偉搞代用糉惠老人

嚟緊嘅禮拜六就係端午節，唔少人都鍾意買幾隻糉返屋企食應節，稻苗學會副主席兼「綠盒子」老闆Marco盧思偉早前就諗到延續「代用咖啡」同「代用飯」嘅概念，同志願福利機構合作喺網上售賣代用糉，每賣出一隻佢哋就會捐多一隻，仲計劃喺端午當日，到粉嶺派畀老人家。

盧思偉話食唔晒嘅鹼水糉可以切粒煲糖水。

其實「代用」概念就係購買完有關食物後，食肆會預留並轉派畀有需要嘅人士享用，而為咗響應近年健康嘅素食風氣，今次佢哋推出嘅「代用糉」就特別加入咗幾款唔同口味嘅高纖材料，包括藜麥、紫薯等，隨機派發，令素食者都可有多個選擇。

講起食糉原來都有學問，Marco話普通八寶或鹹肉糉可以加少少蛋煎一煎，香口好多，至於甜味嘅鹼水糉就可以切成一粒粒之後拎去曬乾，再當湯圓咁加落去煲糖水一流。