政壇：李三元避疫 停赴韓入貨
話說南韓爆發俗稱「新沙士」嘅中東呼吸綜合症，疫情繼續蔓延，唔少前赴當地嘅旅行團即時叫停，就連商界中人都話怕怕，其中一直有到首爾採購皮革嘅華人企業家協會會長John李三元表明，基於疫情仍未明朗，會暫停到當地入貨。
南韓新沙士疫情繼續蔓延，李三元表示暫停到當地入貨。
阿John嘅家族經營皮革生意，十多年前已開始到首爾邊境嘅皮革廠採購牛皮，再轉售予製衣廠，由於韓國廠家多採用大規模生產，皮革價錢比日本平約三成，吸引唔少來自世界各地嘅皮革買手。
不過近年陸續有廠家索性搬遷至內地大連、青島，加上今次新沙士來得突然，阿John形容自己好彩一早開發其他國家嘅入貨渠道，又慨嘆現今時局變化太快，既要留意急劇變化嘅市場需求，面對突如其來嘅疫情、戰亂等，都會殺商家一個措手不及。
