政壇：提滅漁農界 成智攞嚟搞
白鴿黨立法會前議員黃成智因為力撐有條件政改「袋住先」，面臨被開除黨籍，但佢未有停落嚟，尋日聯同多名前核心同前成員公布最新政改建議，包括提出將提名委員會嘅漁農界取消，轉為大專學生界，立法會漁農界議員「高佬賢」何俊賢暗批有人多此一舉，反擊指黃隨時被人踢出黨，籲佢咪花心思喺呢一方面。
設計圖片及對白
黃成智日前已聯同狄志遠舉行記者會反擊白鴿黨對佢嘅批評，尋日再舉行主題為「關鍵一刻，一念之間」嘅記者會，以「一群關心香港前途市民」名義提出最新政改建議，希望提名委員會多個界別，包括宗教界、勞工界同金融服務界，由公司票轉做個人票，粗略估計選民基礎由二十多萬人，十級跳至兩百萬人，佢哋形容就算政改方案被否決，都要討論提委會如何民主化，自言今次係硬着頭皮去做，希望爭取中央、特區政府同立法會議員支持。據知白鴿黨前總幹事陳家偉、兩名白鴿黨前成員梁家裕同周奕希等人都支持呢個最新政改建議。
白鴿黨表明不支持
白鴿黨表明否決政改方案之時，黃成智此時又聯同白鴿黨現任及前任成員公布新方案，當問及會否擔心被指再分裂白鴿黨，陳家偉話方案係想爭取全部議員支持，唔係針對邊個政黨，但言猶在耳，白鴿黨主席劉慧卿強調呢個方案唔代表個黨嘅立場，黨亦唔會支持佢哋嘅建議。
高佬賢接受查詢時話聽到又有人話要取消漁農界就火滾，直指漁農界對香港好重要，可以穩定食物價格、保障食品安全。佢又話歡迎任何人喺全國人大常委會「八三一」決定框架下提出方案，而目前距離表決得番幾日，依家先提出方案根本係冇意思，倒不如努力說服白鴿黨增加對基本法同人大「八三一」決定嘅認知，佢其後更語帶諷刺指黃成智隨時被人踢出黨，呼籲對方唔好花心思喺呢方面喎！
