官衙遷駐將軍澳 最怕好事又多磨
明日復明日，明日何其多。經過多年蹉跎，港府終於向城規會申請放寬將軍澳用作發展政府大樓地皮嘅高度限制，計劃興建四幢大樓，安置目前位於灣仔三幢政府大樓嘅多個部門，以便騰出黃金地段作商業用途。即係咁，當局還地於民無疑係好事，最怕官僚辦事拖拉，加上社會泛政治化，興建及搬遷大計究竟可唔可以如期落實，冇人敢寫包單。
根據當局嘅宏圖大計，將軍澳新政府大樓最高二十五層，將興建地標式建築物，並設置具象徵意義嘅「門廊」咁話。嗱，聽落就似模似樣嘞，事實係點仲要睇過至知，最怕計劃一拖再拖，地標建築變成空中樓閣，咁就貽笑大方咯。
話時話，灣仔政府大樓搬遷計劃已經唔係新聞，早喺二○○八年嘅財政預算案已經提出，當時財政司司長鬍鬚曾仲預計二○二○年完成搬遷添。可惜講者自講，講完就算，到依家仲係無聲無息。
係人都知，香港土地資源稀缺，尤其市區地皮更係買少見少，灣仔政府大樓位處黃金地段，坐擁無敵海景，堪稱「地王」，政府部門長期霸佔靚地，簡直係暴殄天物。三幢政府大樓搬遷之後，可以騰出十四萬三千幾平方呎地皮，地價估計高達三百幾億元，除咗政府庫房可以增加一大筆收入，市場又可以增加甲級寫字樓供應，而且可以帶動將軍澳嘅經濟及社會發展，簡直係一舉數得。弊在港產官僚一向齋噏當秘笈，計劃拖拖吓好似冇咗件事咁，依家距離原定搬遷時間只有唔夠五年，到時究竟搬唔搬得成，真係令人懷疑，分分鐘又成為無米粥嘅咋。
冇法子喇，港產官僚做嘢一向議而不決，淨係諮詢同研究已經有排搞，加上社會高度政治化，爭拗無日無之，反對派有破壞冇建設，為癱瘓港府施政，無所不用其極，郁吓就拉布，郁吓就流會，港府更加寸步難行。咪畀太一叮睇死，灣仔政府大樓搬遷大計萬一有乜阻滯，拖多十年都未必可以成事o架！
講起真係諷刺，香港曾經以行政效率高著稱，成為其他地方學習嘅榜樣，內地改革開放之初，深圳嘅口號「時間就是金錢，效率就是生命」，就係受到香港成功經驗啟發。可惜吖，回歸後香港一味浪費光陰，蹉跎歲月，導致競爭力每況愈下，當年以香港為榜樣嘅深圳已經後來居上，你話港產官僚醜唔醜吖，叮！
