城中鏡：林智剛率團踩車籌款
大企業愈來愈重視公司嘅公益形象，花旗銀行環球個人銀行服務銷售及分銷業務主管林智剛（Lawrence），今日就會率領大約40位同事同埋佢哋嘅家屬，去元朗南生圍「衝線」，佢哋呢個單車活動最細嘅成員唔知會唔會係佢四歲半嘅囡囡呢？
林智剛今日將會帶領一眾同事及家屬去南生圍「衝線」。
今日其實係花旗集團「金球義工日」，到時會有超過3,300名花旗香港義工聯同五間社福機構，參加23項社會服務，嗰日全港五間花旗銀行分行都會有慈善義賣。做咗近兩年花旗集團社會關愛會會長嘅Lawrence就揀咗以踩單車籌款，佢話最難忘嘅義工經驗就係同智障人士一齊完成馬拉松。呢個活動可以為東華三院單車生態旅遊社會企業Biciline籌款，Lawrence可能帶埋四歲半嘅囡囡參加，佢話平時每星期都有兩、三日跑步，對完成呢個單車項目信心十足。
