城中鏡：王敏德父女揮桿行善

打高爾夫球都可以做善事，近年由娛樂圈轉身商界嘅王敏德（Michael）同二女王麗嘉一齊出席呢個高爾夫球日。呢個活動係要為一個教育基金籌款，基金將用作天水圍六十個低收入及破碎家庭嘅子女，暑假中接受領袖培訓活動，預計籌款目標雖只十五萬元，但已可令受助者有個精彩暑假，難怪咁多人熱心支持喇。

王敏德同愛女王麗嘉齊齊打高爾夫球行善。

父女一齊揮桿，做爸爸嘅Michael話個女嘅球技都算OK，因為女兒高中時已玩咗三年，熟晒喇。而且，Michael向來愛享受親子樂，經常會相約子女們一起打高爾夫球同埋揸直升機，但太太馬詩慧就唔太愛打高爾夫球，更加唔鍾意曬太陽。

得到爸爸好評嘅王麗嘉話，小時候已跟隨父親到高爾夫球場觀賽，十五歲正式開始喺美國高爾夫球學校學習，都參加過比賽，但至今未攞過獎。