城中鏡：股市繼續牛
港股暢旺帶挈唔少股民發財，有港產陀飛輪品牌就同財經界名人陳永陸（陸叔）合作，推出錶面刻有牛頭嘅牛市陀飛輪錶開心吓，亦趁機做善事，每賣出一隻錶就捐三千元畀健康快車香港基金（基金）。早前舉行新錶發布會時，前高官兼基金副主席馬時亨（肥亨）到場代表接收大支票，笑稱希望牛錶長賣長有，咁基金就豬籠入水喇！
名牌零售商ISA老闆姚瑞添（左）代理銷售牛錶，右為萬希泉創辦人沈慧林。
沈墨寧（左）送上一隻牛錶兼捐錢畀健康快車基金，逗得馬時亨（右）笑逐顏開。
林智彬（右）及帝皇翡翠執行董事董必政（左）都係陀飛輪錶迷。
兩邊企硬難「轉軚」
不過，呢波牛市即將面對一個大考驗，就係下周進行表決嘅政改方案一旦被否決，唔知港股走勢會點。肥亨一聽到政改就好心噏，聲稱政府已放風，政改通過機會係零，真係好可惜。咁佢有冇幫手游說泛民主派朋友「轉軚」？佢一邊思索一邊回答：「好難」，仲話到咗呢個地步，個個都盡咗力，可惜兩邊都企到咁硬。
肥亨認為，就算政改方案被否決，對股市都唔會有大影響，因為結果一早預咗，股市若要下跌一早就跌咗。佢又相信，雖然今次中央嘅硬任務失敗咗，但都會喺經濟上繼續支持香港嘅。
萬希泉執董沈墨寧就自爆話，今次牛市令佢兩隻蟹股終於鬆綁，唔知係咪戴住隻牛錶帶旺咗運勢。不過，唔係個個都鍾意炒股，家族做玩具生意嘅中華總商會青委副主席林智彬就專心做生意，最近仲設計咗一隻高達陀飛輪錶，佢自稱對高達有一份情意結，因為佢屋企同日本大玩具商BANDAI已合作咗幾十年喎。
