政壇：搞搞政：黃成智發火反擊 數臭白鴿四宗罪
民主黨前立法會議員黃成智被黨紀律委員會（紀委會）建議革除黨籍，下月十六日就判刑。三十年舊情或換來被人狠狠踢出黨嘅下場，成智呢鋪真係好火，一於你不仁、我不義，尋日開記者會大反擊，數臭白鴿黨最少四宗罪，即紀委會判決無證據、無邏輯；窒礙言論自由，排除異己；紀委會文件外洩，黨內中委有「敗類」、「小人」；最後就係主席劉慧卿未查已閂後門，有包庇之嫌，今次真係同黨關係全面破裂。
設計圖片及對白
成智話，作為普通黨員，應享有表達政改嘅言論空間，黨內亦有其他人公開發表唔同意見，只係對佢採取紀律行動，係唔公道、針對佢。佢狠批紀委決定全無證據同邏輯，窒礙言論自由，更傷害黨嘅團結同聲譽。更過分嘅係，白鴿黨中委披露咗原先應該保密嘅內容，劉慧卿仲暗示中委會一定會通過紀委會嘅決定，呢種未審先判，有違公允兼唔尊重佢嘅做法，既違反私隱，又踐踏他人權利，成智直呼中委要反省，黨員亦要被譴責。佢愈鬧愈火，狠批黨內有敗類中委，唔守紀律洩密，居然敢做唔敢認，係真小人。
而且，洩密事件查都未查，卿姐已經話好難查，想不了了之，佢會去信投訴並要求徹查事件，唔希望白鴿黨淪為包庇高層、中委相衞嘅集團。成智慨嘆，○八年佢重返立法會後，每月都有贊助二千元畀落選嘅李永達，咁樣對兄弟，估唔到個黨要趕走佢。
成智明言，絕不會主動退黨。溫和老鴿狄志遠尋日雪中送炭，希望件事能夠緩和。佢又話，成智係死蠢同太單純，而白鴿黨咁樣對待三十年嘅同路人，又確係「相煎何太急」！
