政壇：戲院摸黑開記招 鄧家彪別開生面
工聯會立法會議員鄧家彪早幾日就喺將軍澳一間戲院搞咗個別開生面嘅記者會，一改通常喺所屬政團辦事處或立法會記者室召開嘅慣例。佢話特登揀去戲院開記招，係想大家感受戲院對生活好重要，仲多謝香港戲院商會免費借出場地添。不過，戲院始終都係烏燈黑火，佢哋要摸黑開記招，搞到傳媒拍片影相都唔方便。
鄧家彪（左三）喺烏燈黑火嘅戲院開記招，視線仲要被座位阻隔。
鄧家彪話，大埔及北區過去合共有八間戲院，但係依家一間都冇，居民要跨區睇戲，車費同車程都加重居民負擔。佢建議政府興建新發展區時，將戲院規劃納入「文娛設施」，規定發展商新建嘅商場內一定要有戲院，又建議政府用現有社區會堂改建做戲院，喺指定時間播放電影。
鄧家彪承認，戲院始終係商業項目，政府唔可以畀太多優惠發展商，唔係會予人覺得「官商勾結」，但利益太少又無人肯做，所以成件事都幾難搞。
