政壇：泛民拉布拉上腦 反鬧政府阻民生
立法會財務委員會（財委會）喺暑假休會前，只係剩餘三次會議，尋日原本有兩節、合共四小時嘅會議，卻只得一項議程，一小時就完會。好多泛民主派議員大感不滿，質疑當局點解唔安排討論公務員加薪、長者及綜援戶「出三糧」、興建安老院舍等項目，又認為政府下次會喺議會「打尖」，要求財委會優先處理創新及科技局（創科局）嘅撥款，泛民飯盒會召集人梁家傑鬧政府以弱勢階層利益為人質，勒索泛民議員，泛民中人又靠嚇一定會就創科局拉布喎。有人話，泛民真係「拉布」拉上腦啦，用拉布要挾政府嘅一直以來都係佢哋，家吓反咬一啖，就想搣甩阻住民生項目通過嘅大罪。
設計圖片及對白
誓要拉低創科局撥款
多名泛民議員尋日不斷追問財經事務及庫務局常任秘書長謝曼怡係咪要鬥氣，如果堅持「打尖」提交創科局撥款申請，即係焗佢哋一定要先通過創科局撥款。謝否認鬥氣，但泛民議員就警告，如果政府將創科局撥款凌駕於其他民生項目之上，佢哋一定會「拉布」。
不過唔係個個都「拉布」上腦，民協馮檢基就擔心，如果民生項目無法喺暑假休會前通過，即使放假後處理，最快都要聖誕節時先可以批出撥款，到時撞正區議會選舉，佢擔心對手會用「拉布」阻礙民生項目來攻擊同抹黑佢喎。
佢哋噏咗成個鐘，好多議員都唔耐煩走咗，最高峰時期只係剩低八名議員，搞到主席都要開腔叫議員唔好離開會議室。建制派議員陳鑑林忍唔住開炮，鬧泛民成日搬公務員加薪、安老院舍出嚟，扮到好關心民生議題，但就唔諗吓之前喺大大小小嘅會議上，隨便引用議事規則「拉布」、「所有手段都用晒」嘅係邊個。家吓搞到原本可以審批嘅項目都批唔到，佢要譴責「拉布」就真。
