街市通道漏水近月,市民不滿食環署未適時維修!上水居民李小姐常到石湖墟街市購物,今年四月街市二樓接駁龍豐花園的通道有滲漏,地面積水,「前排多雨,個天花係咁漏水,我見有人放咗個雪糕筒喺度,以為好快整,點知成個月都未整!」李指滲漏影響衞生,亦危及行人,批評食環署遲未處理。

上水石湖墟街市二樓通道出現滲水,通道上有大攤積水。

食物環境衞生署發言人表示,接獲轉介後派員調查,發現所指情況屬實,已即日通知建築署緊急維修。建築署承辦商人員翌日清理淤塞的盛水器和排水管後,該處天花已無滴水情況。

「其實佢哋一早放咗個雪糕筒喺度,即係唔係第一日知啦,點解係要搵《太陽報》先做嘢!」李小姐指食環署身為處理滲水的部門,卻拖延處理轄下街市的滲水問題,大有失職之嫌,要求日後發現問題需即時處理。

第一手消息請下載on.cc東網iPhone/iPad/Android/Windows Phone Apps