縱容帳篷霸路 遲早自食其果

呢，反對派為咗營造聲勢，將於周日舉行反政改遊行，之後幾日都會喺立法會大樓外「滾動式」集會喎。佢哋要求開放夏愨道至龍匯道一段添美道作集會之用，結果警方只同意開放立法會示威區，理由係添美道有大量帳篷，並有木板、鐵釘等危險物品，擔心集會人士情緒失控，出現暴力行為，影響公眾安全。

警方唔係杞人憂天o架。佔領鬧劇結束後，立法會大樓外嘅添美道行人路依然有人佔領，而且不斷擴充地盤，搞到烏煙瘴氣。保安局日前披露，該處有約兩百個帳篷同搭建物，路邊仲有桌椅、頭盔等物件阻塞道路，部分帳篷體積龐大，裏面有冇危險品或者攻擊性武器冇人知，擺明已經變咗激進分子嘅「後勤基地」。

其實，正因為當局有法不依，佔領人士有恃無恐，添美道至會好似以前嘅九龍城寨咁，成為生人勿近嘅三不管地帶，除咗有帳篷及木板、鐵釘，仲有木屋碉堡及大批鋁架、頭盔、玻璃樽等，甚至連壓縮氣體都有，簡直就係一個「武器庫」，問你怕未。更匪夷所思嘅係，早排有反對派議員竟然將發電機運入立法會大樓，而且拒絕保安檢查，佢究竟有咩目的，畫公仔唔使畫出腸嘞啩。好明顯，如果佔領行動死灰復燃，立法會隨時成為反對派嘅指揮部，添美道一帶隨時變成佔領人士嘅根據地，都咪話唔大鑊。

所以話，早知今日，何必當初，警方家陣至識驚，遲唔遲啲吖。最離譜嘅係，政府部門對立法會外嘅帳篷陣視而不見，見而不理，大家互相卸責，始終冇人肯出手執法。呢嗱，添美道帳篷陣不斷擴充，市民怨聲載道，警方過去半年收到超過三十宗造成阻塞嘅舉報，食環署亦收到十一宗有關環境衞生嘅投訴，可惜港產官僚闊佬懶理，卒之尾大不掉，簡直係唔衰攞嚟衰。

自作孽，不可活。政改方案表決在即，反對派磨刀霍霍，話到明隨時包圍立法會，到時就算只有幾千人搞事，都足以搞到天下大亂，警方有排頭痕吖。咪話太一叮唔提醒，港府縱容佔領人士霸道，等於自製炸彈，遲早自食其果嘅咋，叮！