政壇：搞搞政：瘦雞餐誘退位 建仔老將唔吼
政黨最怕新血不繼，變成老人政治，然後慢慢萎縮。民建聯（建仔）早前針對東區同屯門兩大老區推出「退位餐」，以未來四年月薪一萬元嘅地區支部顧問，「低薪」利誘資深區議員退休交棒畀年輕人，點知個餐被譏諷為「瘦雞餐」，黨內反應冷淡，預料蔡素玉、陳雲生等到達退休年齡嘅老將都會力爭連任，第二、三梯隊睇怕都要坐多四年，有排等。
設計圖片及對白
建仔銳意搞年輕化、專業化，早年曾硬性規定年過六十五歲嘅資深區議員退下火線，但冇新人接手，強行一刀切交棒就會變相將議席拱手送畀對家，因此建仔將有關規定延至七十歲，唔再硬性推行，所謂嘅「瘦雞餐」亦應運而生，以該黨議席嚴重老化嘅東區為例，建仔今屆有十四席，除咗委任嘅楊位醒預告唔直選，同維園區議員周潔冰被「鎅」到灣仔區之外，黃建彬、蔡素玉等高齡議員聽聞都無意退下火線。有人分析東區以福建幫為首，同銳意年輕化嘅建仔文化唔同，愈老愈受歡迎喎。
另一老區屯門亦一樣，聽聞轉食瘦雞餐嘅人係零，地膽陳雲生話現階段未決定住，仲話新生代「好有個性」，好似落區工作要求有黨內高層傍住，選舉心態同上一代好唔同，要搵人接棒有困難；再者瘦雞餐每月一萬元，只係相當於保安員，對比每月份糧近三萬元嘅區議員唔夠吸引囉！睇嚟，建仔想老將交棒，顧問費都要加碼至得。
