政壇：阻拉布無方波波谷爆眼

靈魂之窗好重要，發展局局長「波波」陳茂波尋日出席一個活動時，右眼充晒血，就算戴住副眼鏡都清楚睇到右眼眼白一片紅色，情況都好嚴重，原來患咗眼疾。

陳茂波右眼充血，原來係微絲血管爆裂。

波波話，上星期佢長時間睇文件同工作，期間冇乜留意，點知去洗手間照鏡，先發現隻眼紅咗，之後拿拿聲去睇醫生，話因為佢疲勞過度，隻眼爆微絲血管，多啲休息就無大礙。不過，波波對醫生囑咐多啲休息都冇乜信心，佢話，成日要擔心「拉布」令政府工程延誤，又要頻頻諗計應對，想好好休息都唔容易。

其實，立法會拉布拉咗咁耐，官員同議員交手已經唔知幾多個回合，連建制派議員都做各種調整嚟打拉布戰，官員亦應該有橋至得。