政改關鍵時刻，全國政協常委陳永棋（棋哥）近日卻好似靜晒，唔多見佢露面，尋日佢卒之現身廣東社團總會記者會，棋哥會後自爆，原來早前左腳因細菌感染，又發高燒，全身痛到唔郁得，成隻小腿都潰爛晒，最終要入醫院治療十八日先至好番。

陳永棋早前因糖尿病令左腳受細菌感染潰爛，入院十八日治療。

棋哥講番件事時，感覺猶有餘悸，佢話自己一向有糖尿病，但一直自己呃自己唔肯戒口，最鍾意食甜嘢，結果上月着短褲去打高爾夫球時就出事，細菌感染到左腳一個傷口，點知情況一發不可收拾，成隻左腳膝頭以下都潰爛滲血，情況非常嚴重，要即刻入院。

雖然住咗醫院十八日，但棋哥話都算執番條命仔，如果遲啲發現，後果可以好嚴重。經此役後，棋哥下定決心戒甜品，又話除咗喺屋企外唔會再着短褲，避免雙腳傷口被細菌感染。棋哥一家五口兩年前去意大利玩時，成家畀雷劈都無事，今次佢再大步檻過，莫非就係「必有後福」？

第一手消息請下載on.cc東網iPhone/iPad/Android/Windows Phone Apps