政壇：彭一邦「攝」獵工人汗水
藝術中心尋日有個攝影展舉行，展出咗俊和發展副主席彭一邦（Derrick）同馬來西亞攝影師Ming Thein鏡頭下嘅俊和建築世界，呢個名為「Connection連．繫」嘅慈善攝影展，作品將會作慈善出售，每幅9,888元，部分會拍賣，款項捐畀建造業關懷基金同俊和旗下幫助病童嘅「護．聯網 Lifewire」。
彭一邦鍾意呢幅工人維修馬路時影嘅相，佢希望借此表揚同感謝工人嘅默默付出。
今次Derrick拎咗12幅相出嚟展覽，佢自己鍾意邊幅呢？原來係影住IFC、文化中心同太空館頂部嗰幅，因為代表住香港唔同年代嘅經濟繁榮同文化進步；仲有另一幅捕捉工人維修馬路時嘅一刻，係佢有個星期日飲完茶影到嘅，佢希望借此表揚同感謝工人嘅默默付出，並希望大家可以欣賞工人嘅汗水同成就，唔好將一切視為理所當然。
喜歡影相嘅Derrick用開乜機呢？佢話：「今次展出嘅相大部分都係用細機影，以前就用開大機，依家老咗用細機多。」其實佢得四十歲，未講得上個老字！
