政壇：成智結局 勢左右溫和鴿
下月十六日就係民主黨（白鴿黨）決定對黃成智處分嘅大審判日！事前，該黨紀委文件同反對政改嘅老鴿楊森為黃成智寫嘅求情信外洩，令事件疑團多多，成智好唔滿意，今日將開記者會，黨友兼曾經同為匯點人嘅狄志遠都會去撐佢。白鴿黨內溫和派家吓都睇實中委會點做，雖然暫冇集體退黨，但如成智要執包袱，其他溫和鴿有冇後着，譬如拉隊離巢，白鴿黨真係要諗過度過至好。
設計圖片及對白
狄志遠今日會去撐成智，仲話情感上支持成智喎。講番白鴿黨中委會下月十六日嘅會議，佢哋將會處理紀委會嘅建議，成智亦可以出席。在此之前，黨中委、前主席楊森已為成智寫求情信，認為佢已經收番發起聯署，黨內聲譽雖受損，但亦已凍結佢嘅黨籍，唔使再去到開除咁嚴重，楊森更唔想有人覺得白鴿黨分唔同派別。
對洩密追究到底
對文件外洩一事，主席劉慧卿尋日話，由於紀委會未接獲投訴對象，好難查邊個洩密，但係中委都不滿，呼籲要守紀律，不能外洩文件。成智就認為好難查係推搪，「要查容乜易」，佢質疑作為主席嘅劉慧卿曾經證實紀委文件內容，係咪應該認錯道歉，認為主席冇理由唔知規定，反而證實內容，咁就係唔尊重紀委嘅決定，亦影響佢本人嘅利益。成智又話，自己一直都係憑良心講政改，希望香港民主發展進一步，對洩密一事，一定追究到底，亦會去信要求白鴿黨調查邊個披露紀委會嘅文件。
有溫和白鴿透露，成智曾經同溫和黨友講，覺得自己無犯錯，唔會退黨，因為一退就會畀人覺得係自己錯，而且，成智認為自己已冇再發起聯署有條件「袋住先」，質疑發落唔符事實。點都好，依家中委會會議備受關注，今日成智反擊，政圈人士又要買定花生囉。
