政壇：AO歌王復出做即時傳譯
去年六月底退休嘅民政事務局前常任秘書長「AO歌王」楊立門（Raymond），話咁快就可以復出再就業。Raymond尋晚喺香港大會堂為一場梁祝音樂會擔任友情客串嘉賓，佢爆料話，政府已批准佢下個月起可以做受薪工作。咁歌喉媲美大明星嘅Raymond會做邊行？原來係即時傳譯喎！
在王憓（右）嘅二胡伴奏下，楊立門忘情獻唱。
Raymond話將以自由人形式接即時傳譯工作，呢行好渴市，時薪逾千元。雖然佢唔係讀呢科，但升任工業貿易署署長之前，已經不時幫政府做即時傳譯。Raymond最難忘回歸前，即黃宏發做立法局主席嘅年代，黃宏發講嘢經常引述希臘神話，即時傳譯時真係好考功夫。講番音樂會，「二胡王子」王憓（Ray）同鋼琴家張寶龍亦一齊演出，Raymond客串唱咗兩首歌。Ray嘅父親二胡大師王國潼都有到場。
