無證童自願遣返 雙非童再掀波瀾

十二歲無證男童懷仔匿港九年，收留佢嘅外婆最近向入境處自首，男童獲發行街紙，等候調查。事件被激進組織借題發揮，有人到有意接收男童嘅學校抗議，有人踩上男童屋企示威，搞到滿城風雨。直至尋日，男童終於接受自願遣返，據講係因為不斷受到示威者滋擾，即使搬離住所，仍有人三更半夜拍門鬧事，成日提心吊膽。正如男童外婆話齋，既然喺香港已無容身之所，咪惟有返內地囉。

即係咁，無證男童點講都係非法居留，當局依法辦事，無可厚非，但有人上綱上線，乘機搞事，顯然另有目的。正所謂，法律不外乎人情，同樣係非法入境及居留，申請酷刑聲請嘅非華裔人士一樣獲入境處發行街紙，佢哋平均滯港超過兩年，最長接近十一年，唔少人甚至作奸犯科添，激進組織視而不見，淨係咬住無證男童唔放，如果話冇政治目的，細路仔都唔信喇。

所以話，如果以為無證兒童自願遣返就可以平息爭議，市民就可以耳根清淨，咁就太傻太天真嘞，有啲人唯恐天下不亂，又點會咁易收手吖。呢，激進組織聲稱不滿雙非問題纏擾多年，揚言趁明日小一統一派位放榜，前往北區其中一個跨境學童派位中心踩場，抗議雙非童「掠奪」港童學位喎。唔使問阿貴，隨時又係搞到七國咁亂。

其實，隨着港府出招遏止內地孕婦在港產子，雙非問題已經逐漸紓緩。最新數字顯示，由於適齡學童人口下跌，今年獲派頭三個志願小學嘅命中率止跌回升，比舊年同期回升兩個百分點。學位緊張情況已經改善，有人仲要搞搞震，你話係咪無事生非吖。

係人都知，雙非兒童喺本地出世，持有香港身份證，同其他本地兒童一樣，都有接受教育嘅權利，激進組織究竟反對乜嘢呢？冤有頭，債有主，雙非問題源自當年終審法院對莊豐源案嘅判決，激進組織就算要搵人算帳，都應該搵司法機構啦，係咪？

一句講晒，慶父不死，港難未已。香港愈來愈政治化，有啲人為反對而反對，社會陷入內鬥內耗，再咁落去，香港遲早畀佢哋玩死嘅咋，叮！