城中鏡：黃克競後人進軍保健業
「光學儀器大王」黃克競去世後，佢創辦嘅寶源基業於十幾年前轉售畀中華廠商聯合會副會長戴澤良，此後黃氏一家人各有各發展，其中黃克競太太鍾海燕（Heidi）同美國抗衰老專家余啟宸醫生合作嘅保健及護膚品牌，早前喺香港開設首間零售專櫃，好多親朋老友去撐場，包括黃克競嘅孫仔黃嘉倫（Andrew），雖然佢唔係Heidi嘅親生孫仔，不過兩人感情好好，亦一樣咁注重健康，仲不約而同投身保健行業！
鍾海燕（中）開設首間零售點，黃嘉倫（左）同戴澤良太太羅台秦現身支持。
本身係工程師嘅Andrew話，自己喺家族企業出售前已經自行創業，後來因緣際會代理冰島出產嘅皮膚護理產品，估唔到成為熱賣產品，自此專注做保健行業。咁又係，始終健康重於財富，難怪衣食無憂嘅Heidi都瞓身推廣健康觀念。余啟宸就話，發覺健康嘅人都需要防患於未然，於是推出自家品牌。
