飲食業難請人維持咗好一段時間,最低工資委員會委員黃傑龍(Simon)尋日喺社交網站,上載一張批准員工放生日假嘅表格,相信打工仔都好羨慕。Simon話早前佢同公司一班主管開會,商討有咩方法可以令員工開心啲,大家諗到不如放一日「生日假」同一日「義工假」,並於今年初實施。結果員工真係開心啲,對公司有歸屬感,咁流失率自然低啲喇!

黃傑龍嘅員工放假名目好新奇。(資料圖片)

Simon話,做飲食業經常大時大節都要返工,放生日假對公司運作影響不大,而且畀員工放屬於自己嘅假期,都幾窩心。咁二月二十九日生日嘅員工咪四年先可以放一次生日假?Simon笑言,只要係生日月份攞假就得喇!Simon咁有誠意做良心僱主,不過講到勞工界爭取多年將勞工假同公眾假期睇齊,佢就話一刀切做法可能令小店更難經營,有能力嘅食肆就可以做多啲,最好彈性處理喎!

第一手消息請下載on.cc東網iPhone/iPad/Android/Windows Phone Apps