城中鏡：余漢坤西藏頓悟 禮佛不戒葷
潮流興食素，除咗健康理由，唔少人係因為宗教原因而戒食肉類。早前喺一個活動上見到一班名人，包括新界社團聯會理事長陳勇、仁濟醫院董事局副主席黃美斯（Macy）同鄉議局前主席劉皇發女婿兼離島區議員余漢坤（Randy）等。Randy透露，自己十幾歲開始已經信佛仲戒食牛肉，但有一次佢去西藏，發現喇嘛都會食肉，之後佢就開始食番肉喇！
陳勇（左二）自爆曾經係食肉獸。
余漢坤去完西藏就開始食番牛肉。
黃美斯（左）跟隨身旁嘅演慈法師食長齋。
黃美斯拜會演慈法師愛上齋
Randy話，佢過往戒食牛肉目的係為咗祈求觀音保佑，不過十幾年前去咗一趟西藏，期間聽咗幾日佛經，得知原來喇嘛都一樣會進食肉類，同埋明白咗一個道理，就係為咗達到某種目的而信佛或戒食牛肉，都唔係正確嘅觀念，所以此後佢就冇再刻意去戒食牛肉。
茹素多年嘅Macy就同媽媽一齊到場，佢近八、九年開始食全齋，事緣有一次去拜會演慈法師，並住喺寺廟幾日，期間除咗食齋之外冇任何嘢可以食，佢先發現齋都可以好好食，仲有好多唔同款式，之後佢就索性食長齋喇！
同場嘅陳勇笑稱自己唔係佛教徒，亦冇食齋，仲自爆中學時代係「食肉獸」。佢試過出席完食齋嘅活動後，忍唔住即刻去鋸番塊扒祭五臟廟，係名副其實嘅「牛魔王」。不過隨住年紀漸大，佢發現身體唔再需要咁多能量，於是就自動減少食肉。當日寶蓮禪寺方丈釋智慧法師都有到場，見佢神采飛揚，出入行路都冇揸拐杖，又唔使人攙扶，睇嚟身體好番唔少。
