政壇：搞搞政：慢必議標時「性」起
香港人工時長，立法會尋日辯論立法制訂標準工時嘅動議，勞工界議員大吐苦水，人民力量嘅議員陳志全（慢必）都講埋一份，不過，佢嘅主題卻係「性」。慢必發言時，一時話長工時影響港人嘅性生活，一時又揶揄政府高層，仲聲言他日佢若選特首，實會將提升市民性生活質素寫入政綱喎。
設計圖片
慢必尋日嘅發言，顯示對性話題好有興趣，批評長工時影響港人生活質素，影響性生活後，又以特首梁振英回應安老院舍問題時、歸咎土地不足為例，揶揄如果同CY提及港人性生活問題，一定又會賴係土地問題。只不過，慢必翻人舊帳都唔做功課就抵打喇，本港早有機構調查，認為香港生活環境擠迫，係影響港人性生活質素嘅一大主因，呢個的確關係到地嘅問題噃。
而且，佢有口話人，冇口話自己，佢喺立法會發動拉布行動，人為延長議員、秘書處同多個界別人士嘅工時，直頭係議會長工時元兇之一，咁又點計呢？
講到最後，慢必大大聲話，他日自己競選特首，一定會制訂提升港人性生活質素嘅政綱。又係性，咁除咗性之外，佢仲有冇其他吸引港人、對香港有益有利嘅政策構思呢？
