政壇：民協老虎仔豪言 一粒子彈打選戰
台灣早年嘅大選曾因兩粒子彈令選情丕變，外號「老虎仔」嘅民協廖成利近日喺社交網站突然話，未來選戰嘅三大致勝原因，其中一個係「只需一粒子彈」，令人有無限想像空間。老虎仔解釋，佢所指嘅「子彈」其實係「三力」，即人力、物力同財力，事關佢哋冇大水喉支持，好似民協馮檢基同蔣志偉等人出席嘅籌款晚宴，粗略估計只籌得十多萬元。
廖成利（右起）、蔣志偉同馮檢基齊出席籌款晚宴。（互聯網圖片）
幫參選團隊改花名
據知民協四出搵「子彈」，或者同佢哋想開水喉資助疑似參選人有關。老虎仔話，民協初步計劃年底派出二十六人參選，包括新、舊人各十三人，而每人擬資助數萬元作競選之用，如使多過呢筆數就要自己「包底」。
另外，佢哋又幫各區疑似參選團隊改定花名，包括深水埗少林足球、龍城七子、油尖三劍俠等，咁絞盡腦汁都係為咗增加知名度，認真係用心良苦。
