政壇：泛民驚青 拒獨見高官

據悉，政府已放棄拉攏民主黨成個「票倉」，反而諗住好似上次政改咁，採「逐個擊破」嘅策略，撬得四、五票，政改夠票通過就大功告成。最近有關方面開始約見議員，莫乃光自爆，早幾日政府約佢單獨見面，但畀佢拒絕，事關佢唔想私下約談後，事後有乜不利傳言就跳落黃河都洗唔清。結果政府好快就安排佢孖住同屬公專聯嘅梁繼昌一齊見。據知原本獲邀單獨見面嘅梁耀忠都拒絕單獨見。

不過，民協馮檢基同衞生服務界嘅李國麟夠薑單刀赴會，醫學界嘅梁家騮咪都係一支公走去見CY，然後抬頭挺胸話，都係會堅決否決政改。

泛民中人咁驚青，為乜呢？政界一直流傳，有關方面為咗游說泛民議員轉軚，開價一億元買一票。又有傳言話上一次傾政改方案，時任特首嘅「貪曾」曾蔭權喺單獨見泛民時，揪出黑材料要挾泛民轉軚，呢啲消息係咪空穴來風？或者係泛民中人真係身有屎、心太虛就唔知喇。