政壇：韓疫失控 何倍倩轉攻日
南韓嘅新沙士疫情愈爆愈勁，本地旅遊界都要應變，名媛何倍倩尋日出席一個活動透露，佢本來預訂咗機票，同老公喺本周去首爾放假休息一下，點知當地新沙士感染人數愈來愈多，佢都好驚，改期之餘，仲打算轉換放假目的地，譬如去日本或泰國。
何倍倩原打算本周去首爾玩，但被新沙士疫情嚇退。
何倍倩話，本來打算同老公兩個二人世界減吓壓：「一個月前已買咗機票同訂好餐廳，但怕搭飛機傳染就好麻煩，而且當地情況愈來愈嚴重，唔值得博吖！」依家佢打算轉去日本或泰國玩，講起日本仲好興奮添，事關日圓匯價低，可以去當地血拼。
講起疫情，何倍倩都諗起自己嘅慘痛經歷，話早年曾同兒子一齊感染手足口病，所以對傳染病好有戒心，今次新沙士病情威脅香港後，佢都叫兒子多啲洗手，保持衞生。
