保險界立法會議員陳健波鍾情投資豪宅，年前先後買入南區豪宅屋苑貝沙灣多個單位，仲做埋業主委員會主席，早幾日再獲九成七信任票成功連任。但年底區議會選舉起烽煙，貝沙灣屬於南區嘅薄扶林選區，聽聞現屆區議員司馬文考慮競逐連任，自由黨嘅楊哲安亦對該議席虎視眈眈，陳健波雖然係建制派議員，但佢表明唔會偏幫任何一方，免政治滲入屋苑喎！

設計圖片及對白

事實上，好少立法會議員兼任業主委員會主席，陳健波唔單止係例外，仲憑高票成功連任，但佢就唔肯講總投票人數有幾多。佢話本來諗住專注立法會工作，計劃將主席一職交畀其他人做，可惜冇人肯做，惟有自己頂硬上做多屆。

稱要中立禁宣傳

佢又透露，司馬文同楊哲安早前分別拜會過佢，希望佢可以為選舉打開方便之門，例如畀佢哋喺屋苑範圍派宣傳單張咁，始終貝沙灣係一個容納一萬多人嘅龐大社區，如果可以入去宣傳，相信會對選情有利。不過，陳健波話業主委員會係幫居民解決問題，佢作為主席要維持中立，講明唔會偏幫任何一方，即係唔畀佢哋入去宣傳，唔知兩人會唔會繼續游說呢？

最近陳健波頻頻喺議會內發功，除咗痛斥拉布議員，又形容建制派不斷掣否決泛民嘅預算案修正案，好似「傻仔鐘」咁，可以話係幫建制派出一口惡氣。雖然議會工作繁忙，但陳健波自言心繫居民議題，所以不時搵機會將區內嘅民生議題帶上立法會。佢曾經建議政府將專線小巴由十六座位增至二十四座位，以應付區內交通需求，本來以為冇咁快有回音，但近排聽聞政府好似研究緊有關議題，唔通政府真係聽到佢嘅聲音？

第一手消息請下載on.cc東網iPhone/iPad/Android/Windows Phone Apps