關閉分局大細超 香港郵政累街坊

係咁嘅，香港郵政計劃今年九月關閉屯門安定郵政局，市民日後要寄信，就要到屯門中央郵局。對於今次「殺局」，街坊媽聲四起，有區議員踢爆，黃大仙竹園分局每日只有二百五十人使用，舊年虧損一百二十萬元，一樣有得留低，反而安定分局每日四百多人使用，虧損七十七萬元就要被叮走，擺明大細超。區議員警告香港郵政若一意孤行，將會提出司法覆核喎。

咁署方點解畫呢？署方話殺局同虧損無關，而係考慮到服務需求同承接問題喎，但噏完一大輪，都解釋唔到點解厚此薄彼，點解雙重標準，市民肯收貨至奇喇。講真，香港郵政長期經營不善，淨係過去兩個財政年度就蝕咗過億元，以全港一百二十五間郵局計，其中一百間錄得虧損。香港郵政日子難捱，無以為繼，只能繼續殺局自保，根本同自我凌遲冇乜分別。

正常嚟講，一間公司經營不善，應該諗吓點樣改善服務，點樣拓展新業務，偏偏香港郵政坐以待斃，一味諗縮數，唔係縮短辦公時間提前收工，就係殺局，服務質素每況愈下咯喎，問題咪衰多幾錢重囉。可能有人會話，今時今日網絡時代，傳統郵遞服務需求愈來愈少，香港郵政做唔住唔奇吖。其實，世事無絕對，事在人為嘅啫。正如有人話齋，家陣速遞行業商機無限，香港郵政零售點多係一大優勢，如果同物流公司合作，絕對有得諗。可惜吖，官老爺胡混度日，邊有心機搞改革吖。

唔怕唔識貨，最怕貨比貨。好似新加坡郵政咁吖，推出廿四小時免費自助包裹站服務，不知幾受歡迎。又好似法國咁，當地郵政部門積極開發其他商機，包括替長者送藥以至代客查看水電氣錶，不知幾有創意。點解人哋做得到，香港做唔到呢？咪就係因為官僚無能咯。最離譜嘅係，香港郵政正經嘢做唔掂，「失信於民」多過食飯，服務質素有口皆悲，講到滋擾傳媒，充當政治打手就鬼咁落力，你話係咪唔死都冇用吖。

始終都係嗰句，與其坐視香港郵政累人累物累街坊，浪費公帑，獻醜國際，不如直接執咗佢好過啦，叮！