城中鏡：立會實習生 關注拉布潮
激進泛民多次喺立法會發動拉布戰，連立會實習生都關注議員拉布嘅情況，尋日當面問立會秘書長陳維安等，可否透過修改議事程序來避免拉布，陳維安話議事規則委員會已開過幾次會，希望議員之間能夠達到共識。
陳維安（前中）同實習生講解立會日常運作，有實習生話關注議員拉布情況。
立會秘書處舉辦嘅專上學生實習計劃啟動活動，陳維安同二十三名實習生講解立會日常運作，佢透露，兩年前隨立會訪英，當時適逢嗰年嘅預算案嘅拉布戰落幕，兩地嘅立法機關就講起點應對拉布。佢憶述，英國國會秘書處嘅職員當時話喺十九世紀末，英國議會都出現類似拉布嘅情況，一個法案往往要花好長時間先處理到，而最有趣嘅地方係，當時主持會議嘅代表同立會主席曾鈺成喺議會上講嘅嘢差唔多。莫非佢係暗示香港依家嘅情況落後，猶如百幾年前嘅英國？
