城中鏡：仁愛堂試用 中樂治腦退化
慈善機構每年都要絞盡腦汁諗吓有乜新搞作，仁愛堂尋日公布今年大計，打算試用中樂醫治腦退化症。主席史顏景蓮話，依家多數會用西藥醫腦退化症，治療費好貴，副作用又多，所以諗住試吓呢種非藥物療法有冇效。
中醫顧問劉振寰話，中國古代一早記載「五音療疾」，以中樂嘅五音對應五臟，調節「怒、喜、思、憂、恐」。
史顏景蓮（右）打算推動中樂醫治腦退化症，旁為政府新聞處處長聶德權。
羅台秦（右）話打算試行透明環保箱，以提高回收率。
五音對應五臟療疾
據了解，呢種治療方法好似食西藥咁，患者要不斷聽中樂，一個禮拜聽三日，每日聽四次，每次聽十五至二十分鐘，療程為期半年，希望幫到患者提升認知能力同改善情緒。
史顏景蓮話今次計劃喺七月開始試驗一年，期間會搵中大醫學院嘅研究人員評估成效；負責今次計劃嘅中醫顧問劉振寰話，中國古代一早記載「五音療疾」，主要理論係以中樂嘅五音「角、徵、宮、商、羽」，對應人體五臟「肝、心、脾、肺、腎」，用嚟調節人嘅「怒、喜、思、憂、恐」喎。
另一方面，仁愛堂副主席羅台秦話留意到唔少人丟垃圾落回收箱，所以今年會生產透明嘅三角柱形回收箱，等大家唔會再丟錯垃圾落去，至於三角柱形係參照回收標誌嘅造型，計劃會喺九間職訓局院校試行，主要回收膠樽，如果成功就會推展到其他公共場所。
