政壇：搞搞政：蘇澤光 葉劉鬥挖前AO幫手
政務官（AO）出身嘅前政府官員喺政商界一向係「搶手貨」。尋日上任機場管理局主席嘅蘇澤光，未來要應對多個重大議題，包括興建機場第三條跑道爭議、機場北商業區未來興建超級購物城等，因此機管局都唔例外，最近喺新民黨挖走曾任該黨政策總裁嘅前AO王瑤琪，由尋日起出任機管局企業事務總經理，新民唔執輸搵咗另一名前AO加盟，似乎新一輪前AO「執位」勢必出現。
據聞，王瑤琪九十年代開始做AO，○八年離開政府前出任商務及經濟發展局助理政府資訊科技總監，之後曾到醫管局任機構事務主管，上月底離任新民黨政策總裁。
其實，最近加入機管局嘅仲有前新鴻基地產（中國）董事及項目總監區浩章，同埋市建局前企業傳訊總監邱松鶴，前者擔任物業發展執行總監，後者喺二月開始任首席傳訊主管，似乎機管局未來多場硬仗，佢哋都會喺唔同崗位出一分力。
雖然啱啱被挖走一名前AO，但新民黨話咁快就物色到另一名前AO、一二年退休前任南區民政事務專員嘅Alex黃彥勳，尋日開始接任政策總裁。黨主席葉劉淑儀話同Alex識咗至少三十年，以前喺貿易署共事過，而當年佢到美國讀書，仲帶埋女兒探過當時駐華盛頓工作嘅Alex。咁都未算，據聞葉劉女兒同Alex嘅仔年紀差唔多，仲一齊喺史丹福大學讀暑期班。對於Alex加盟，葉劉笑言對方係「廉價義工」，除咗做政策研究，仲會幫手搞選舉，尤其係南區喇！
