政壇：IT五巨頭細時各有際遇

阿里巴巴主席馬雲，細細個已經鍾意睇武俠小說，最想做《笑傲江湖》個風清揚，逃學打交同樣咁叻，成績差就梗，唯獨係英文特別好！皆因佢蝦阿爸唔識英文，阿爸開口鬧，佢就用英文還拖，英文就愈學愈起勁。

騰訊CEO馬化騰細時迷戀天文，小學四年級就自己落手整望遠鏡，夢想做天文學家。但老師話佢知，讀天文嘅多數都係做地理老師，就係咁，佢轉軚去接觸電腦。

至於百度CEO李彥宏，阿爸成日帶佢睇戲曲，結果就迷上，常搵床單包喺身唱戲，仲因為生得「白裏透紅，水靈得很」，畀山西一個劇團取錄。但之後李彥宏見家姐做咗大學生後，有好多人羨慕，佢於是又立志考大學，結果入咗北大。

講到京東CEO劉強東喺細個時何止無奶茶飲，食都無啖好食，皆因佢生於江蘇最窮嘅地方，屋企曾經窮到連續幾年日日餐餐都只有紅薯同粟米。

少時超Like《水滸》同《三國》嘅聯想名譽主席柳傳志，話令佢最傷感嘅人物係諸葛亮，覺得佢「學富五車但落得個淒涼下場」咁話。