政壇：發叔大仔自動「登基」
八十年代開始出任新界鄉議局主席、外號「新界王」嘅劉皇發事先張揚退下火線，鄉議局尋日舉行換屆選舉，發叔嘅大仔Kenneth劉業強喺無競爭情況下自動當選鄉議局主席，兩名副主席張學明、林偉強亦順利連任，任期直至一九年五月底為止。不過，Kenneth甫上任首日，外界已猜測發叔會否垂簾聽政，Kenneth重申唔會，但承認以父親嘅經驗，任何人問佢意見都係適當喎。
發叔自言身體唔錯
Kenneth上周報名參選鄉議局主席時，二十七鄉代表冇全部出席，令人懷疑佢未爭取到二十七鄉全數支持，不過尋日現場所見，有一百二十幾名鄉委出席改選，有人認為已證明Kenneth得到各方極大支持。
Kenneth當選主席後發言，形容戰戰兢兢、任重道遠，香港依家正值多事之秋，新界人要和諧團結先可以抵禦衝擊。其後用英文回答傳媒問題時，提到係自行交表格參選，否認「世襲」主席嘅講法。至於日後會唔會接替父親競逐立法會鄉議局功能界別議席，佢話依家言之尚早。
最近外界傳言發叔嘅健康情況大不如前，Kenneth上周報名角逐鄉議局主席時，亦未見發叔現身，直到尋日發叔終於現身，首度開腔闢謠自言身體唔錯，不過現場所見佢嘅步履有啲不穩，全程要由張學明同林偉強二人傍實。發叔又話，鄉議局會一如既往為鄉民謀福祉，自己愛鄉、愛民之心亦唔會有絲毫改變。
曾同發叔共事四十六年嘅張學明，亦向發叔大送高帽，形容雙方關係亦師亦友，又讚揚發叔係出色嘅政治領袖，而七十九歲嘅長者行動不便、冇咁敏捷係正常生理現象，但強調對方精神狀態同思維冇問題。
